女人都咁話︰「喺香港地做男人慘過做女人……」（一）
男女平等呢句嘢聽咗19幾世，但男女身體構造上本來就唔同，要講Fair真心唔易，一句「女人會M痛又要生仔，真係好辛苦架！」就已經殺晒班男人。話就話華人社會講求「男尊女卑」，但事實上，香港嘅情況係點？你懂的……
講返句公道說話，Mean娜作為女仔，相當明白做女人係非常辛苦！M到又痛、生仔又痛、脫毛又痛，仲要Keep住減肥扮靚呢啲終身事業，真係沒完沒了。但你畀我揀，如果喺香港地呢個地方，我都係會揀返做女人唔做男人。皆因喺香港做男人實在係太太太太太辛苦！
就以結婚為例，有時未必係個男人唔想結，而係結婚實在有太多責任要個男人孭上身。對女人而言，結婚就係搵個自己鍾意嘅、有一定經濟能力嘅對象，但對男人而言，就唔係咁簡單。基本上由搞結婚、擺酒、去蜜月、買車買樓到買戒指，都係要個男人全部攬上身。身邊有好多情侶嘅Case，都係大部分女友想30歲前結婚，但30歲，先係男人事業起步嘅時期，有幾多人可以咁好彩，30歲前已經有車有樓？龐大嘅經濟壓力再加上男人嘅自尊，真係唔好怪個男人愛你但又唔敢娶你，面對呢種壓力，真心係人都想迴避。
即使女朋友好體貼，話可以結咗婚先慢慢儲錢買樓又好，甚至肯AA制出錢同你分擔條數都好，但作為一個處於「男尊女卑」體系社會嘅男人，呢個心理關口並唔易過。首先，女方父母可能會諸多不滿︰就算自己個女唔係咩新鮮蘿蔔皮，但自己生嘅點都會當掌上明珠一樣愛錫，除非係奉子承婚唔好意思鋪張，如果唔係，多數都要求阿未來女婿要有車有樓，單係呢份來自長輩嘅壓力，就足以令男人好難抬得起頭……結婚？對一般嘅香港男人而言，其實真係唔係咁易。
Search